Средината за игра и учење има исклучително влијание врз когнитивниот, социјалниот, емотивниот и психичкиот развој на детето. Со креирањето на физичка и психолошки безбедна средина, која располага со разновиден материјал, задачи и ситуации прилагодени на развојот на детето, воспитувачот го поттикнува учењето низ самостојно и групно истражување, преку игра и интеракција меѓу децата и возрасните. Овозможувајќи секое дете да се чувствува добредојдено, воспитувачот гради и одржува атмосфера во која секој поединец е почитуван и секое дете е важен дел од средината. Кога на децата ќе им се понуди сигурна средина која одговара на нивните специфични потреби, тие ќе бидат мотивирани да работат заедно, да се вклучат во различни активности и да научат да бидат иницијативни. Безбедната стимулативна средина во нашата градинка и изворите од неа се подеднакво значајни компоненти во процесот на раното учење и развој.

Тргнувајќи од тезата дека учењето се случува на разни начини и во разни ситуации, крајната цел на воспитно-образовниот процес е  да се постават високи, но сепак реални очекувања за секое дете и да се поттикнува љубопитноста, истражувањето, критичкото размислување и соработката, така што секое дете ќе може да развие афинитети и вештини за доживотно учење.

Стратегиите и техниките кои ние ги користиме се насочени кон поттикнувањето и развој на вештините кои се неопходни за децата да станат самостојни, да се негува емпатијата, да се осознава самопочита, да бидат самокритични, да водат грижа за другите и да ги почитуваат разликите. Преку играта и учењето ги поттикнуваме децата да размислуваат, да поставуваат проблем и самостојно да доаѓаат до решение.

Овозможуваме секое дете и семејство, особено оние кои се дел од ранливите групи, да бидат вклучени, почитувани и вреднувани, да партиципираат, да растат и се развиваат во средината која им ја нуди нашата градинка. Воспитувачот преставува модел на однесување преку секојдневните активности во насока да ги почитуваат и вреднуваат разликите и да се прифати секое дете

Бидејќи децата најдобро учат во природна средина со своите врсници нашата градинка нуди еднакви можности како и целосна флексибилност во задоволување на специфичните потреби на сите деца, се прилагодува начинот на работа така да се излегува во пресрет на потребите на секое дете, а кај оние со потешкотии во развојот и дополнителна помош. Се применуваат различни и ефективни стратегии за организирање на занималната во која се почитуваат разликите помеѓу децата, што подразбира правилна организација ов просторот, дидактичките материјали и средства, креативно уредување, како во внатрешниот простор така и во надворешниот.

Воспоставуваме континуирана меѓусебната комуникација и интеракција со родителите, затоа што тоа е од особено значење за децата и нивниот правилен развој. Ние ја почитуваме важноста на семејството како прва и важна средина во која детето ги добива првите искуства. Соработката со семејствата е важен предуслов за оптимален развој на детето и нашата професионална улога е да ги усогласиме ставовите и очекувањата и да остваруваме заеднички резултати. Се стремиме и ја негуваме довербата, отвореноста, толеранцијата и спремноста за почитување на личните и професионалните компетенции преку размена на информации за детето